Көннөрү киһи баҕатын, санаатын былаас хаһан эмэ истибит түгэннээх эбитэ дуу? Урукку историябытагар "сэбиэскэй норуот" санаата "баартыйа санаатыттан" туораабат буолара. Оттон билигин демократическай государствоны тута сатыыр үйэҕэ, былаас биир өттүнэн: "Гражданскай общество суох! Дьон туохха да наадыйбат!" диэн үрдүкү трибунаттан норуоту хомуруйан күүһүнэн кэриэтэ общественнай хамсааһыннары, палаталары тэрийэр, иккис өттүнэн, дьэ общественноспын диэн норуот санаатын этээри гыннаҕына, кумаар да тыаһыгар  холообот. Бу аата тугуй?

Саха сирин сахалыы тыыннаах куорат оҥоруохха диэн общественность туруорсар. Омугуттан тутулуга суох куорат олохтоохторо аан дойдуга ураты архитектуралаах куоракка олоруохтарын баҕараллар! Ону баара, 203-с кыбаартал син биир сиэрэй КПД "хоруопканан" кыстаныа үһү, өссө ханнык эрэ греческэй таҥара аатынан ааттаныа үһү... Дьон санаатын тоҕо ким да ахсарбатый?

"Туймаада уоттара" хаһыакка общественник Илья Михайлович ФОМИН "Дьокуускай - чох буолбут дьокуут омук куората этэ дуо?" диэн ыстатыйата таҕыста (http://old.aartyk.ru/sakha/item/1460-%E2%80%9Cdokuuskay-choh-buolbut-dokuut-omuk-kuorata-ete-duo?%E2%80%9D). 

Глобализация содулуттан син биир кыра омук, хайдах да хараастыылааҕын иһин, Өксөкүлээх ааспыт үйэ саҕаланыытыгар өтө көрбүтүнүү син биир симэлийэр дьылҕалаах.  Илья ФОМИН ол иһин ыстатыйатын улуу бөлөһүөк тылларынан ааттаабыт буолуохтаах. Баҕар 70-н, баҕар 100, этэҥҥэ бардахха 150 сылынан, кэнэҕэс дьон "Дьокуускай куорат диэн, былыр, чох буолбут дьокуут омук куората этэ" диэн ахталларын курдук, үйэлээх тутуу матырыйаалыгар тааска - сахалыы тыыммытын иҥэриэҕиҥ, бэйэбитигэр тааска өйдөбүнньүк хаалларыаҕыҥ  диэн санааттан ыстатыйа суруйбут дии санаатым.

Илья ФОМИН этэр: "Сахабыт сирин киин куоратыгар сахалыы тыыны киллэриэхпитин, “Дьокуускай - дьокуут омук куората” диэн этиэхпитин төһөлөөх баҕарарбыт буолуой! Саха президеннэммиппитин, саха мээрдэммиппит кэннэ, дьэ сибилигин тутум былдьаһан ол ыра санаабытын олоххо киллэриэхтээх этибит! Бүгүн-сарсын туох-ханнык олох, былаас кэлэрэ биллибэт. Аныгыс Ил Дархаммыт дуу, Баһылыкпыт дуу Саха сирин эрэ, Хотугулуу-Илин региону эрэ баһылыыр... “Регионнары бөдөҥсүтүү” үлэтэ бара турдаҕына, национальнай өрөспүүбүлүкэ буолар статуспутун да сүтэриэхпитин сөп. Ол иһин билигин тутуу былдьаһан, сахалар саатар куораппытын “САХА КУОРАТА” дэтэрдии саҥалыы дьаһаныахтаахпыт.

Иккиһинэн, бу иннинэ өбүгэлэрбит тааһынан уһанарга үөрүйэхтэрэ суоҕа. Саха тааһы буолбакка, маһы хаамтарара. Онон, биир өттүнэн олохтоох тутуу тэрилтэлэрин өйөөн – кэнэҕэс ыччаттарбытыгар бу эйгэҕэ суолу аһан биэриэхтээхпит. Бэйэбит ыччаппыт тааһынан тутууга хото киирдэҕинэ, дьэ күүтэр “национальнай колориттаах” архитектурабыт дьиҥ олоххо көстүө этэ буоллаҕа!".

Дмитрий СЛЕПЦОВ,
Дьокуускай к. олохтооҕо, Тыыл уонна үлэ бэтэрээнэ.