Бастаан, 2006 сыллаахха Наука уонна профессиональнай үөрэхтээһин миниистирэ Геннадий Толстых бюджет харчытыгар тутуллубут 3 101 560 солк. сыаналаах элитнэй дьиэни уонна онтон эрэ бэтэрээнэн сыаналаах додо курдук улахан, сылаас гарааһы бэйэтигэр "хап" гыннаран харытыттан харбата сыспыта. 

Суукка, оччотооҕу өрөспүүбүлүкэ президенэ В.Штыров кэлэн Геннадий Толстых туһугар туоһу буолбута. Түмүгэр, Дьокуускай федеральнай суута "буруй олоҕо суоҕун" туһунан уураах таһаарбыта.

Толстых кэнниттэн өссө биир миниистир "дьыалаланар" - Тыа хаһаайыстыбатын миниистирэ Роман Дмитриев. Роман Гаврильевич"800 тыһ. ыскайдаабытын" билинэн, дьиэ хаайыытыгар ууруллар. Кини кэнниттэн олорбут миниистир Степан Охлопков эмиэ прокуратура өттүттэн улаханнык  уорбалана сылдьан баран соторутааҕыта быыһанна, "буруй састааба суоҕунан" дьыала тохтотулунна.
Ыччат миниистирин Алексей Еремеевы утары холуобунай дьыала 4 сылы быһа тэриллэ сатаан баран кыаллыбата. Былырыын бэс ыйын 7-гэр Дьокуускай куорат суута Еремеевы 7 сылга хаайыыга уураахтан элбэх дьону уолуппута. Ол бириигэбэр өрөспүүбүлүкэ Үрдүкү суутугар көтүрүллэн, саҥаттан бастакы сүһүөх суукка утаарыллан көрүллэн, быйыл саас кулун тутарга "буруйтан босхолуурга" диэн уурааҕынан түмүктэммитэ. Прокуратура Үрдүкү суукка ол уурааҕы утаран үҥсэн баран хоттордо. Алексей Еремеев уонна Павел Семенов кырдьыктарын  дакаастаан кыайдылар, туох баар буруйтан босхолоннулар.

Доруобуйа харыстабылын миниистирин В.Александров дьыалата эмиэ "олоҕо суоҕунан" сиэттэрэн быйыл саас  тохтотуллубута.

 Ирдиир-силиэстийэлиир сулууспалар, норуот харчытыгар мээнэҕэ иитиллибэтэхтэрин бэс ыйын 9 күнүгэр дакаастаатылар. Дьокуускай федеральнай суутугар ОДьКХ урукку миниистирин Александр Антоненконы дьыалата дьүүллэннэ. Антоненко буруйа дакаастанан, биэс сыл дьиэ хаайыытыгар уураахтанна.

 Санатар эбит буоллахха, Антоненко утары холуобунай дьыала төрүөтүнэн, кини 2007 сыллаахха "Водоканал" ГУТ салайааччытыгар Николай Жестковка биэрбит сорудаҕа буолбута. Антоненко бэйэтин тус сыалыгар уонна үлэтигэр-хамнаһыгар сүүрдэригэр анаан "Водоканал" суотугар үс массыынаны ыллаттарбыт ("Тойота-Лэнд-Крузер-100", "Тойота-Лэнд-Крузер-Прадо" уонна "Фольксваген-Туарег").

Ол түмүгэр барыта 10 мөлүйүөн кэриҥэ солкуобай орускуоттаммыт. "Водоканал" бу сууманы куорат олохтоохторо ууга төлүүр тарыыптарыгар киллэрэн "толуйан" ылбыт. 
Антоненконы "коррупцияны уодьуганныыр" хампаанньа сиэртибэтэ, ону ааһан дьыалаламмыт саха миниистирдэрин омугунан "убатаары" холуобунай эппиэтинэскэ тартылар диэччи дьон эмиэ баар. "Миниистирдэринэн салҕанан үөһээ салалтаҕа ыттыахтарын баҕараллар" диэччилэр эмиэ көстөллөр.
Степан Охлопков, Алексей Еремеев, Вячеслав Александров холуобунай  дьыала тэриллибэтэҕэ эбитэ буоллар, билиҥҥээҥҥэ диэри миниистирдии олоруохтара эбитэ буолуо. Маннык балаһыанньаҕа, аныгы  кэмҥэ дуоһунастамматах көнө диирбитигэр тиийэбит.