Киинэни аатырбыт режиссер Никита Аржаков устуоҕа. Үбүлээһинин "Сахафильм" бэйэтэ уйунар. 
Санатар эбит буоллахха, В.Яковлев - Далан билиҥҥи президеммит Егор Борисов учуутала. Егор Афанасьевич оскуолаҕа үөрэммит кылааһын салайбыта. "Дьикти саас" айымньыга улахан кылаас үөрэнээччилэрин бастакы тапталлара, учууталлар икки ардыларынааҕы сыһыан кэпсэнэр.
Егор Борисов былырыын улахан дуоһунаһыгар олорбута биир сылын туоларыгар бэчээккэ  интервью биэрэн турар, онно "Дьикти саас" айымньыга кини прототип буолбутун маннык этэр: "Саамай мэник уол уобараһын буллаххытына - ол мин буолуом" (Т.Нутчина, "Кыым", бэс ыйа, 2011 с.).  
Билэр дьон этэллэринэн, Егор Борисов айымньы сүрүн геройун - Гацан прототиба буолбут. Онон режиссер Борисовка майгынныыр уолу сүрүн герой оруолугар оонньотуон сөп. 
Киинэ устуутун, артыыстар, режиссер былаанын туһунан Aartyk.ru портал аныгыскы нэдиэлэҕэ сиһилии сырдатыаҕа.