"ЯТЭК" Саха сирин гааһын 98%-нын хостуур, ол гынан баран хайдах монополист испииһэгэр киирбэтэҕэ дьикти.   Александр Александрович этэринэн, газоконденсат хостонор себестоимаһа 2 солк., оттон тохсунньу 1-гы күнүттэн газоконденсаты сыанатын хас да бүк үрдэтэн 12,5 солкуобайга эмискэ тиэрдибит. "Ылар буоллаххытына ылыҥ, суох да суох, атын батарар сири булуохпут", диэн "СӨ ОДьКХ" ГУТка дьыл ортото этэн соһуппуттар. Өскөтүн УФАС "ЯТЭК" сыананы үрдэтиитигэр сокуону кэһиини буллаҕына, "ЯТЭК" миллиардынан сууматын сүтэриэн сөп диэн Александр Ноговицын сабаҕалыыр.

Гаас хостуур хампаанньа өрөспүүбүлүкэ бас билиитигэр баар эрдэҕинэ, тыа сиригэр конденсатынан оттуллар хочуолунай бөҕөтүн туппуттара. Билигин итинник "уолутар" сыана быһылла турдаҕына туох да бюджета дук буолуо суох. "Онон хочуолунайдарбытын төттөрү чоххо, сиикэй ньиэпкэ көһөрөр түбүккэ түстүтүт" диэн коммунальнай тэрилтэ дириэктэрэ этэр. "СӨ ОДьКХ" быйылгыттан 2017 сылга диэри 300 хочуолунайы тутуохтаах, саҥардыахтаах. Аҥаардас быйыл 98  объегы тутуохтаах уонна өрөмүөннүөхтээх. 

"СӨ ОДьКХ" газоконденсат оннугар таас чоҕу оттукка туттар санаалаах. Дьабарыкы Хайаҕа, Хаҥаласка (Дьокуускай), Киирэпкэ (Ньурба), Сангаарга, Зырянкаҕа чох хостуулларыгар сакаас түһэртээбит.  Сангаардар 30 тыһ. туоннаны хостоон кыһыннарын этэҥҥэ туораабыттар. "Уопсайынан даҕаны, кэлин, чох хостууру сөргүттэххэ сатанар" диэн Ноговицын этэр. 

Оттугу, уматыгы тарҕатар Саха сиригэр уустук. Өрүстэр уолаллар, онон уунан сайын таһаҕас тиийиэхтээх сиригэр кыайан тиийбэккэ хаалар. Хаалбыт таһаҕаһы суол турдаҕына массыынанан тиэртэрэллэр эбит. Ол суотугар, биллэн турар, эбии орускуотуран тахсаллар. "Сылга коммунальнай таһаҕаһы таһыыга 6 млрд солк. көрүллэр. Ол сууматтан син биир тахсабыт. Холобур, Аммаҕа сайын улахан уйуктаах судно 14 эрэ күн сылдьыан сөп, хоту өрүстэргэ, холобур, Дьааҥыга ааспыт сайын уу суох буолан букатын даҕаны эрэйдэннибит", - диэн Александ Александрович этэр. Ол иһин оттугу, уматыгы хоту улуустарга 2 сыл саппаастаах гына тиэйэллэр эбит. 

Быйылгы навигацияҕа бэлэмнэнэн "СӨ ОДьКХ" уунан таһаҕас таһар тэрилтэлэри кытары дуогабар түһэрсэн, уматыктарыгар харчы биэрэн олороллорун Александр Ноговицын кэпсиир. Быйылгы дьылга уу суола быстыбатаҕына эрэ, өрөспүүбүлүкэ олохтоохторо тоҥмокко-хаппакка, быстыбакка-ойдубакка эрэ эһиилги кыстыктарын этэҥҥэ туоруохтарын сөп. Оттон будулҕан туманнаах, кырыа кыһыннаах дойдуга олох олоруу - этэҥҥэ дьылы туораан күөх окко үктэниинэн ааҕыллар  буоллаҕа.