Салгыы сиһилии “Кыым” хаһыакка суруналыыс Владимир СТЕПАНОВ суруйбут ыстатыйатын билиһиннэрэбит. Сэргээҥ, сэҥээриҥ:

“Ойуун кистэлэҥэ аныгы билим тылынан

Василий Иванович Оконешников  аатын Саха сиригэр истибэтэх киһи аҕыйах буолуо. Кини кылгастык эттэххэ: "Киһи организмын уорганнарын үлэлэрин барытын Менделеев таблицатыгар баар элеменнэр атомнара салайан олороллор. Ойуун, киһи ыарыытын, ол атомнары кытта сибээстэһэн, үлэлэрин көннөрөн эмтиир. Оттон барыларын салайар саамай сүрүн көмпүүтэри - уран атомын - киһи дууһата диэн ааттыыбыт" диэн түөрүйэлээх.

Кини Кашпировскай суолун хайбатаҕа

Үгүспүт кини этэр дьайыылара хайдах үлэлииллэрин төбөбүтүгэр оҥорон көрүөхтээҕэр, сатаан батаран да өйдөөбөт буолуохпутун сөп. Ол эрээри, В.И. Оконешников эмтээбит дьоно аҕыйаҕа суох. Кини сорох дьоҥҥо "ыарыыҥ саҥа тахсан эрэр эбит, ону ол уорганнар "көмпүүтэрдэрин" көннөрөн биэрэн хаптаттым" диэтэҕинэ, ыалдьан эрэйдэнэ илик киһи итэҕэйимиэн да сөп курдук. Дьиҥэр, баҕар ол ыарыыбыт хаптайара да буолуо эрээри, ону ким көрөн турбута баарай...

Оконешников эмтиир дьоҕурун оннооҕор ойууннар билинэн (ойуун бэйэтин сатаан эмтэммэт дииллэр) эмтэнэр сурахтарын истэбит. Онон, Василий Иванович, харчыга ымсыы киһи эбитэ буоллар, эмтиир дьоҕурунан Базылхан Дюсупов, Джуна, Кашпировскай, Алан Чумак курдук тэлэбиисэринэн, интэриниэтинэн "пиарданан" аат-суол бөҕөтүн оҥостуон, Кириэмилгэ тиийэ ыҥырыкка сылдьар эмчит буолуон, аатын билбэт буола байыан сөптөөҕө. Ону баара, саха киһитин сэмэй майгытынан кини "харчыга наадыйбат".

Аны, "ол кини кэнэнин туоһута" диэҕи, билии-көрүү мааны,  аныгы үөрэҕи,  билими бэрт үчүгэйдик билэр,  Новосибирскайга үрдүк үөрэҕи бүтэрбит инженер-конструктор идэлээх, философия билимин хандьыдаата. Бэрт сытыы-хотуу, нууччалыы-сахалыы устар ууну сомоҕолоон, сааһылаан саҥарар араатар бэрдэ, саха биир ураты айыллыылаах киһитэ. Инньэ гынан, кини өбүгэлэрбит "дьиҥнээх улахан ойуун дьону албыннаан тиэрэ байбыта суох" диэн этэр сиэрдэрин-майгытын тутуһар эбит диэхпитин сөп.

Новосибирскайга сырыттахпына, В.И. Оконешников: "В.В. Ромм диэн киһилиин суруйбут "Инженерия шаманизма" диэн кинигэбит типографияттан субу тахсан эрэр, ону аҕыйаҕы илдьэ кэл эрэ", - диэн көрдөспүтүн быһа гыммакка аҕаллым. Дьиктитэ диэн, Новосибирскайга Василий Иванович ураты кыаҕын, үөрэҕин күүһүн итэҕэйэр нуучча дьоно баалларын билэн соһуйдум. Аэропорка А.В. Губанов диэн эдэр, Дьокуускайтан төрүттээх нуучча киһитэ киллэрэн биэрдэ. Кини аҕата Оконешниковтыын космофизика институтугар бииргэ үлэлээбиттэр. Эдэр киһи Баһылайбытын олох күүскэ итэҕэйэр эбит. Туох эрэ ураты дьикти, көдьүүстээх, күүстээх эмтиир ньымалаах диэн кэпсиир.

Губанов "урут өттүгүм уҥуоҕун төбөлөрө ыалдьан тайаҕынан сылдьарым, ону Оконешников эмтээн үтүөртэ. Билигин уҥуоҕум бөҕөргөөн, айкидонан дьарыктанабын" диир. Былырыын сайын куртаҕа дуу, быара дуу ыалдьан, олох түүрэ тартаран сыппыт. Быраастар чуолкай диагноз туруорбатахтар. Хата ити кэмҥэ Василий Иванович Новосибирскайга кинигэтин үлэтигэр кэлэ сылдьар эбит. Эмиэ ити уорганнарга эппиэттиир атом көмпүүтэрдэр “өйдөрүн-төйдөрүн" булларбыт,  ол кэннэ ыарыыта ааһан, иккиһин киирэ илик эбит. Бу аҕыйах хонуктааҕыта Иркутскайтан аймахтара дьахтар төбөтүгэр искэн тахсыбытын көрдөрө Новосибирскайга кэлбит.

Быраастар "олус улахан искэн, түргэнник эппэрээссийэлиибит, дойдугар төттөрү тиийэр кыаҕыҥ суох" диэн куттаабыттар. Ону Дьокуускайга олорор Оконешниковтан "көмөлөһүөҥ дуо?" диэн көрдөспүттэр. Кини "атом көмпүүтэрдэрин нөҥүө (интэриниэт курдук) хайа баҕарар ыраах сылдьар киһини кытта сибээскэ тахсабын" диэччи. Бэрт улгумнук эмиэ көмпүүтэрин "табыгыратан" эмтээн барбыт. Дьахтар ыарыыта намыраабыт. Ол кэннэ нэдиэлэ буолан баран барбытын, быраастар "эмиэ да искэн буолбатах курдук" диэн саарбахтаабыттар.

 "Инженерия шаманизма"

Саҥа тахсыбыт В.Оконешников уонна В.Ромм монографиялара итинник дьикти ааттаах. Аннотациятыгар "На страницах издания авторы попытались раскрыть технологии шаманских магических обрядов, рассмотреть, какими глубинными механизмами обеспечивается воздействие на погоду, осуществляется лечение человека. В работе представлена оригинальная модель Универсума, описывается шаманская астрономия, показана возможность диагностики и коррекции здоровья человека через систему атомов управления" диэн суруллубут.

Кинигэни ааҕан баран өйдөөтөххө, урут В.И. Оконешников иннинэ ойуун чараас эйгэни кытта алтыһар ньыматын, эмтиир технологияларын билим тылыгар көһөрөн быһаарбыт киһи суох эбит. Онон Оконешников оҥорбут систиэмэтэ ойууну итэҕэйбэт Европа үөрэхтээхтэригэр ити процесстар хайдах баралларын быһаарар суолдьут буолбут. Онон кинини А.Тарковскай "Сталкер" диэн киинэтин сүрүн дьоруойун курдук, киһи өйдөөбөт эйгэтин дьоҥҥо быһаартара үөһэттэн анаан ыыппыттар быһыылаах. Судургутук эттэххэ, биһиги Оконешниковпыт оҥорбут атом көмпүүтэрдэрин үөрэҕэ аан дойдуга баһылаан олорор "субу көстөрү эрэ итэҕэйэр, билинэр" билим өйдөөбөт, ол эрээри "туох эрэ баар" диэн сэрэйэр эрэ эйгэтин аанын арыйар күлүүһэ буолбут.

"Көстүбэт информация хонуута, чараас эйгэ күүһэ-кыаҕа муҥура суох, билиҥҥи киһи мэйиитин кыаҕын 5 %-нын эрэ туһанар, уоннааҕыта кэмин кэтэһэн утуйа сытар" дииллэр. Көстүбэт эйгэҕэ сыһыаннаах Шамбала, соматилар, "үһүс харах" эҥин курдук өйдөбүллэри билигин сымыйа диэбэттэр. Аан дойду хайдах айыллыбытын билээри, "таҥара частицата" диэн ааттанар Хиггс бозонун тутаары андроннай коллайдеры туттулар. Баҕар, билим ити суолунан барара сыыһа буолуо. Ол оннугар бу Оконешников арыйбыт суолунан барбыттар чараас эйгэҕэ түргэнник тахсыахтарын сөбө буолуо. Итини кинигэ аата да бигэргэтэр. Кини өр сыллаах чинчийбит, үөрэппит үлэтин түмүгэр, чараас эйгэни өйдүүр инженернэй тиһик, ньыма сааһыланан оҥоһуллубут дииргэ төрүөт баар буолбут курдук.

Инникини тымтыктанан көрбүт суох. Ол да буоллар, мин 2007 с. "Кыымҥа" В.И. Оконешников үлэтин туһунан төгүрүк остуол ыытан, икки балаһалаах матырыйаал оҥорон, билиһиннэрэн турабын. Оччолорго ити үөрэх түөрүйэ эрэ курдук буоллаҕына, нуучча омук учуонайа, культурология билимин дуоктара В.В. Ромм "Инженерия шаманизма" диэн кинигэни суруйарга Оконешников үөрэҕин эргитэ сылдьан тургуппут. Атын омуктар ойууннарын кытыннаран араас эспэримиэннэри оҥорбут. Онон иккиэн бибилэтиэкэҕэ бииргэ олорон суруйбатахтар. Ромм Оконешников үөрэҕин үөрэппит, Европалыы үөрэхтээх дьон өйдүүр тылларынан суруйбут. В.В. Ромм "бу кинигэ туох дьайыылаах буолуон билбэппит. Рецензия суруйбут геолого-минералогия билимин дуоктара, физика-математика билимин дуоктара А.Н. Дмитриев "киһини атомнарынан тэлгэтэр сэрэхтээх кинигэни суруйбуккут" диэн таайтаран эппитэ элбэҕи этэр" диэн суруйар. Оттон А.Н. Дмитриев бэйэтэ рецензиятыгар маннык суруйбут: "Жизнь непрерывна и бесконечна, и не только вещественным трехмерным телом (плотью) жив человек. Пора дать право и возможность жить и Душе, и Духу Человека.

И именно Тонкая материальность (на Эфирной основе) содержит неисчерпаемые жизненные возможности Великого Будущего на основе новых качеств нашей земной Среды обитания. Именно на этом методологически и экспериментально (шаманские технологии лечения, познавания и постижения тайн Жизни) настаивают авторы", - диэбит.

В.В. Ромм Оконешников ураты үөрэҕин "Циркумполярнай цивилизация" диэн научнай-практическай кэмпириэнсийэҕэ кэлэ сылдьан билсибит. Оконешников дакылаат ааҕан баран дьону диагностикалаан, эмтээн барбыт, дьон дьиктиргээн бары Оконешниковы сырсан барбытын түмүгэр, кэмпириэнсийэ ыһылла сыспытын учуонай ахтар. Уон сыл устата Оконешников туруорбут диагноһа 100 % сөп буолбутун дьиктиргээн бэлиэтиир. Кини бу ойуун феноменын үөрэтэргэ Оконешниковтыын билсэн биэс  сыл үлэлээбитэ бу кинигэ буолан тахсыбыт.

Ромм үрдүк таһымнаах ойууннар бары үрдүк үөрэхтээхтэрин: Бурятия үрдүкү удаҕана (Дуурисха удаҕан) Н.А. Степанова Европа уон университетын профессорын, В.И. Оконешников билим хандьыдаатын, Тува үрдүкү ойууна Монгуш Кенин-Лопсан устуоруйа билимин дуоктара буолалларын ыйар. Оконешников түөрүйэтин итинник бэлэмнээх дьону ылан чинчийбит. Ромм Арассыыйаҕа киһи ыарыытын эндэппэккэ билэр таһымнаах үс улахан ойуун баар: Новосибирскай эмчитэ А.М. Герасимов, Бурятия үрдүкү удаҕана Н.А. Степанова уонна биһиги В.И. Оконешниковпыт - диэн ааҕар.

Ойууннааһыны быһаарар үөрэх

Ромм бэрт дьикти эспэримиэннэри ыыппыт эбит. 2013 с. Новосибирскайга Киһи Институтугар В. Буненков диэн эдэр худуоһунньук хартыыналарын туруоран баран Н.А. Степановаҕа хартыына туһунан санаатын этэригэр көрдөспүт. Соһуйуохтарын быатыгар, удаҕан хартыына туһунан буолбакка,  худуоһунньук доруобуйатын,  илиитин тоһуппутун, ыарыыларын туһунан кэпсээбит. Сонно тута интэриниэтинэн Улан-Удэҕэ, Дьокуускайга баар ойууннарга ити хартыыналары көрдөрбүттэрэ - дьонноро Степанова Новосибирскайга эппитин тылыттан тылыгар диэри хатылаабыттар. Сарсыныгар Г.И. Муранов диэн худуоһунньук хартыыналарын туруорбуттар. Эмиэ доруобуйатын туһунан кэпсиэ диэн күүппүттэр. Онтулара ойууннар хартыыналарга ойууламмыт персонажтар туһунан элбэх информацияны биэрбиттэр. Ол аата худуоһунньуктан хартыынаҕа атын-атын информация бэриллэр буолан тахсар. Баҕар, ол иһин сорох хартыына киһини тардара, сороҕу аахайбакка ааһарыҥ буолуо.

Бу кинигэ сүрүннээн ойууннааһыны урукку өттүгэр билиммэт Европа дьонугар туһуламмыт диэбиппит. Кинигэ түмүгэр юрист билимин хандьыдаата В.И. Разуваев: "Появление книги "Инженерия шаманизма" - явление уникальное. В ней шаман (Оконешниковы эттэҕэ - В.С.) избрал в качестве объекта своего взаимодействия - науку, для того чтобы проникнув в ее дух, заставить его служить самопознанию шаманской практики. С наукой здесь обходятся по-свойски, как шаманы научились и привыкли обходиться с горой, рекой, долиной, медведем - со всем, что окружает жизнь человека и способно стать помощником, союзником, защитником, открыть неведомое, отдать себя во услужение, установить незримые контакты... Центральным героем повествования является эфир. Главной особенностью эфира - действие через число. Космические числа космически огромны.

Но внутренне упорядочены, что обнаруживается в магических квадратах (Оконешников ити квадраттары туттан 9 сыыппаралаах мовелогиятын өрүү кэпсиир - В.С.), которым подчиняются глубины мироустройства... Магия цифр, используемая шаманом, рождается не произвольно, не в качестве арифметической игры; ее закономерности, и это нужно отнести к несомненным достоинствам книги, усматриваются в структуре первоэлементов микромира, которые сведены в те самые магические квадраты, обеспечивающие начальное и универсальное равновесие мира", - диэн суруйбут.

Түмүктээн эттэххэ, В.И. Оконешников уонна В.В. Ромм Европа дьонугар ойууннааһын сымыйа буолбатаҕын, аныгы билим өйдүүр тылынан быһааран суруйбуттар. Бу кинигэ нөҥүө кинилэр Чараас эйгэни үөрэтэр, алтыһар кыахтаналларыгар ньыма оҥорон биэрбиттэр диэххэ сөп. Эт-сиин уонна Дууһа Айааччыттан (үрдүкү информация хонуутуттан) биир кэлим айыллан кэлбиттэрин билиниигэ тиийдэхтэринэ, киһи-аймах өйүгэр-санаатыгар, билимҥэ улахан өрөбөлүүссүйэ буолар. Баччааҥҥа диэри сайдан кэлбит аан дойду матырыйаалынай өттүн эрэ кэлтэйдии көрөр билим тиһигэ төрдүттэн ыһыллар кыахтаах. Итини дакаастыырга улахан сыралаах чинчийэр үлэ, ылахтаһыылаах киирсиилэр уонна элбэх бириэмэ ирдэнэрэ чахчы.

Оттон бүгүн биһиги биир дойдулаахпытын В.И. Оконешниковы өр сыллар усталарыгар сыралаһан аан дойду айыллыытын атын хараҕынан көрөн оҥорбут үлэтэ, үөрэҕэ бастакы улахан ситиһиилэммитинэн эҕэрдэлиибит”, - диэн суруналыыс Владимир СТЕПАНОВ ("Кыым") ыстатыйатын түмүктүүр.
 ***

Аартык.ру