Бу дьыл ахсынньы 12-13 күннэригэр АГИИК ( ректор С.С.Игнатьева) камернай саалатыгар Оһуохайга ыччат республиканскай күрэҕэ буолар. Төрөөбүт тылы, төрүт культураны сайыннарарга, ыччаты үтүөҕэ тардарга анаммыт күрэх 2 араас бөлөҕүнэн хайдан ааһыа.
1-кы бөлөххө 14-тэн 18 –ка дылы саастаахтар, оттон 18 тан 35 дылы саастаахтар 2-с бөлөххө мустан, Ытык Оһуохай өлбөт-сүппэт тыыннаах эйгэтигэр холонон көрүөхтэрэ. Ол холонуулара хайдаҕын, хомуһуннаах хомус кэрэ куоластарын, холобура суох хоһоон саһыылыыр дьоҕурдарын, имигэс- табыгас хамсаныыларын ыҥырылыбыт сүбэ быһаарыаҕа.
«Оһуохай Түмсүү» баһылыга Александр Джурович Данилов саха омук төрүт культуратын, чуолаан Ытык Оһуохайы өйөөн-такыйан, ыччакка тиэрдэр үлэлэрин иһин АГИИК ректора Саргылана Семеновна Игнатьеваҕа, фольклор кафедратын сэбиэдиссэйигэр Евдокия Степановна Сергинаҕа бэйэтин дириҥ махталын тиэрдэр.«Бу 2012 сылтан саҕалаан, Гиннес рекордун ситиһиитин кэнниттэн, ыччат Ытык Оһуохайга интэриэһэ лаппа үрдээбитин бэлиэтиибин. Сайын куорат болуоссатарыгар тэрийэр оһуохайбытыгар үксэ эдэр ыччат сылдьар. Онно төрдүбүт үгэстэригэр оҕолору үтүөтүк иитэр үөрэх кыһалара кылааттара эмиэ улахан, холобур куоракка бэлиэтиэм этэ 17-с оскуоланы уонна кини директорын Афонская Лена Петровнаны.
Дьиҥ Этээччи, манна эттэххэ, мээнэ көстүбэт. Этээччилэр диэн Үс Үрдүк Айыы бэлиэтээбит дьоно буолаллар – поэзия, музыка, хамсаныы – барыта баар кинилэргэ. Онон бу маннык курэхтэргэ биһиги алмаас тааһы көрдүүр курдукпут – баҕар, бу уол дуу, бу кыыс дуу саастара ситтэҕинэ, улуу Дархан Этээччи буолуохтара диэн.
Эрэнэбин - бу күрэххэ элбэх ыччат кыттан, элбэх талан арыллан, биһиги кэлэр кэм этээччилэрин илэ көрүөхпүт!» - диир Александр Джурович.
Кыттыан баҕалаах ыччаттар 89142804829, 89142902107 (Александр Константинович) телефоннарынан күрэххэ суруттарыахтарын сөп.
***
А.ТАРСКАЙ.