Эбээн эмээхсинин салҕалас илиитэ Саха омук сарсыҥҥытын санаппыта

Понедельник, 02 Декабря 2013 10:30
Оцените материал
(7 голосов)
Иҥсэ-мэнэгэй иэдээннээх иччитэ
Туундара устун чуһуурбута
Хаардаах төбөлөөх ытык хайалар
Иэннэрэ кытта кэдэҥнээбитэ
 
Орто дойдуну ытарчалыы ылбыт
Обот-солоҥ иэнигийэ кыламмыта
Хотугу сири арахпакка буулаат
Айылҕа оҕолорун эһэргэ туруммута
 
Арҕаа дойду адьырҕатын сибиэнэ
Тыаһа суох сыыллан кэлбитэ
Кыракый тордох дьолун тобоҕун
Кытаахтаан ылаары үрдүгэр барыйбыта…
 
Кырдьаҕас эмээхсин уоһа ибирдиир
Табаґыт олоҕун ыараханын кэпсиир
Мааны тойон тоҥ муус сүрэҕэр
Норуотун кыґалҕатын тиэрдэ сатыыр
 
Сылаас дьиэлээх, сымнаҕас олохтоох
Куорат көҥдөй дьоно өйдөөбөтөхпүт
Салгымтыалаах мунньах саалатыттан
Тахсан барарга эрэ тиэтэйбиппит
 
Туран хаалбыта ол барахсан
Саҥата суох ыйытыы буолан
Тордох дьонун тиһэх эрэллэрин
Толорботоҕуттан хараҕа ууланан
 
Арай кини кыһыытын-абатын
Ийэ Айылҕа эрэ өйдөөбүтэ
Тоҥ сүрэхтээх дьонтон кэлэйэн
Кумуйбут тордоҕу сылааһынан имэрийбитэ
 
Эбээн эмээхсинин салҕалас илиитэ
Саха омук сарсыҥҥытын санаппыта
***
Н.ТЮЛЯХОВА

Комментарии 

#1
Рио 04.12.2013 04:32
Ючюгэй багайытык суруйар поэтесса эбит.
#2
одри 05.12.2013 16:15
бары да кендей дьон буолан эрээхтиибит быьыылаах...

Добавить комментарий

Защитный код
Обновить

Aartyk.ru