Көҥүлү батыспыт өбүгэм
Кыргыһар үйэттэн кыйдаран
Олорбут сириттэн тэскилээн
Хоту сир хонноҕун булбута
Чыҥыраан тымныы байҕалбыт
Хонноҕор хорҕойо сытаммыт
Өркөн өй күүһүгэр тирэнэн
Сахалар өлөрү кыайыахпыт
***
Үүттээх чэйгэ тэҥнээх саха тыла
Хоту сир халлаанын сылыппыта
Сиэдэрэй оҕуруо аспыт этиитинэн
Тыйыс сир салгынын сымнаппыта
23.10.13
Мин тыыным хаайтарар кутталтан
Хаһан эрэ бу Сиртэн барартан
Ону утарсар да кыаҕа суохпуттан
Дьылҕа Тойон тыйыс Ыйааҕыттан
29.11.13
Аҕам соноҕосторун хомуйарын курдук
Хоһооннорбун толоонтон сылгылыам
Тымныы тыаллаах тыллары сааһылаан
Сүрэхпин сылаас тыынынан угуттуом
Ыллыктаах тыллаах ийэбин суохтуубун.
Күннээҕиттэн ырааҕы эҥсэр сэһэнин
Куруутун кэрэни ыралыыр кэпсээнин
Биһиэхэ үтүөнү, үөрэҕи түстүүрүн
Күнү кытта тэбис-тэҥҥэ туран-олорон
Айылҕаны кытта куруутун дьүөрэлэһэн
Өбүгэбит сиэрин-туомун ытыктаан
Олорбуттар, үлэлээбиттэр ийэлээх аҕам
Сааһыран истэҕим ахсын суохтуубун
Сир үрдүгэр саамай күндү дьоммун
28.11.13
Мин былыр хаһан эрэ
Алтаай улуу сыһыыларынан
Хааман хаспалдьыйар
Хатын хаан талыыта этим
Аас ийэ буолбут Алтаайым
Оо, күөх чээлэй дойдукам!
Олорбутум дии эн киэҥ дуолгар
Талбыппынан көҥүл таалалыы….
Илбиргэстээх ыарахан ытарҕам
Тойон эрим санаатын таайардыы
Кутталы сэрэйэн куччаан иһэрэ
Куппун-сүрбүн куруук баттыыра
Ытыс таһынар им-балай түүн
Алдьархай эмискэ ааҥнаабыта
Үүт-тураан олохпут огдолуйан
Өһөхтөөх өстөөх үөрүүтэ туолбута
Көҥүл кулута буолбут өбүгэлэрим
Хадаар харсаах хааннара сирдээн
Булларбыта Муустаах байҕал биэрэгин
Чыҥыраан тымныы тэбэр сүрэҕин!
Улуу Дуол ыйааҕын уйбатах сордоохтор
Баһылык этиитин умнубут муҥнаахтар
Олордохпут хаар-муус дойдубутугар
Кимҥэ да тобуктаабатах толукпутугар
Оттон мин сүрэхпэр саһан
Истиэп буора өрүкүйэр
Күнүһүн илэ, түүнүн түүлбэр
Аас ийэ Алтаайым ыҥырар.
***
Мин туспар ама да буолтун иһин
Сир көхсө кыараатаҕыан!
Салгынныын ыараан
Халлаанныын хараҥаран
Тулам барыта дьиппиэрдэҕиэн!
Ытыс таһынар ыас хараҥа
Бүрүүкээтэҕиэн!
Хайа да диэки хайыс
Тыбыс-тымныы харахтарга кэтиллэбин
Кэннибинэн чугуйабын!
Түөрт өттүбүттэн барытын сабардаан
Чуҥкунуур чуумпу иһийэр.
Бу орто туруу бараан дойдуга
Ким эмэ баар дуо иччилээх тыыннаах
Сымнаҕас, сылаас майгылаах
Амарах айыы дууһалаах!
Ким эмэ баар дуо?!
?
***
Ыарыыттан ынчыктыыр күннэрбэр
Ыытаар дуу Айылҕам алгыскын
Ыгыллан ытыллар кэмнэрбэр
Ыраахтан алҕаар дуу Эбэкэм
Хотунуом Өлүөнэ өрүһүм,
Тумнастан тууйуллар түүннэрбэр
Тапталгын этээр дуу чуумпутук
Санаарҕаан санньыйар чаастарбар
Сайҕаар дуу санаабын аргыыйдык
Тапталлаах Туймаадам барахсан
***
Эмээхсин буолбут кыысчаан ытыыр
Холбоччу түспүт санна ыгдаҥныыр
Ийэтин түһэҕин көрдөөн ыҥыргыыр
Аастыйбыт астаах төбөтө ибирдиир…
Н.Тюляхова.
Комментарии
Баһылык этиитин умнубут муҥнаахтар
Олордохпут хаар-муус дойдубутугар
Кимҥэ да тобуктаабатах толукпутугар
Иччилээх тыллаах бу кимий?